話說，前幾日去佐敦食飯，落到地鐵商場，地下底層既拉麵food court（前身為沙嗲王）。未入去之前，門口已經有個男人不停大叫「XXXXX」（聽唔明）。因為馬吉氏要等朋友先入去，所以就被迫聽佢大叫左成5分鐘，不禁都覺得佢叫得夠專業……
我地黎到拉麵food court，就唔講拉麵，講下E個food court既「獨特」設計。首先，入場前會派你一張RFID咭（如圖），用黎叫野食同比錢既。而food court係有不同的拉麵店，你行過每間都會有人親切地問侯你，叫你「試下啦！試下啦！」咁。然後，揀好就比咭佢拍，拍完，又拎多一大舊野（如圖），結果你就拎著兩件野返位。再之後，有野食到果陣，舊野會響同震，提示你去拎麵。如果你覺得佢嘈想關左佢？Sorry，客人無得關既，結果，你又要拎住兩舊野，一邊嘈一邊震，一邊行去拎麵。
食緊麵果陣，已經同朋友傾緊e個設計，發現都唔係一無事處既，例如：客人可以返位等啦，仲有客人可以返位等，同埋客人可以返位等咁啦。
食完麵，吹下水問個朋友聽唔聽到門口個男人叫乜，朋友話返比我聽先知原來叫緊「歡迎光臨」…（好似係）
臨走前，八掛問下收銀阿嬸，如果無左張咭會點呀？點知佢一句突埋黎，話：「我地有辦法架啦！（你咪理啦！）」唉…今時今日，吹下水都唔得。乜人情味都無…任你有幾多個人係門口大聲9叫「歡迎光臨」都無用啦…
作者：馬吉氏
搞開科技野（including but not limited），有搞笑、內幕野，一定同大家分享。